Prošeakta heivehit sámegiela ja kultuvrra dearvvašvuođa- ja fuolahusbálvalussii Porsáŋggu gielddas.2011-01-26
Porsáŋggu gielda álggahii muhtun áigge das ovdal prošeavtta heivehit sámi giela ja kultuvrra dearvvašvuođa- ja fuolahusbálvalussii Porsáŋggu gielddas.
Av: Alf E. Nystad
Dá lea barggu raporta dán rádjái, ja bivdit velá álbmogis veahki viidáset bargui. |
|
Prošeavtta áigumuš lea loktet dearvvašvuođa- ja fuolahusbálvalusa bargiid kulturáddejumi.
Bargit besset oassálastit giellakurssaid maid Sámi giella- ja kulturguovddáš lágida, ja maiddái oassálastit logaldallamiid iešguđetge fáttáin, gos sámi kultuvrra guovdilastet.
Čakčat lágideimmet 3 tiimmu logaldallama fáttáin kulturáddejupmi ja mo sámi pasieanttat deaivvadit Norgga dearvvašvuođasurggiin. SANKS jođihii kurssa.
Guovvamánus galget muhtimat oassálastit 3 tiimmu logaldallamii maid Mearrasámi diehtoguovddáš lágida ja 6 tiimmu logaldallamii demeansa ja sámegielat pasieantta birra maid Oahpahusbuhcciidruoktu Kárášjogas lágida. Čađahat maid guovttebeaivásaš seminára oppalaš ja kultuvrralaš sivaid birra, gos sámi kultuvra deattuhuvvo, manne mánáide ja nuoraide lea váttis muitalit duolbmamiid ja veahkaválddálašvuođa birra.
Mii guoská geavaheaddjiide, de lea juo giellaválljen sierra čuokkis dikšo- ja fuolahusbálvalusa ohcanskovis. Nu sáhttá ge dalle juo go juohká ásahussaji dahje bálvalusaid oaidnit gii hálida sámegielat divššára, jus leaš vejolaš.
Buohcciidossodagas lea Rukses joavku šaddan sámegiel joavkun. Dán joavkkus galggašii ain juo okta sámegielat divššár juohke vávttas. Nu besset ge sámegiellagat ovttas čohkohallat ja sámástit, ja sámegielat divššárat fuolahit divššu. Mis lea šiehtadus Bærtua mánáidgárddi sámegielossodagain boahtit juohke maŋimuš gaskavahku mánus lávlut.
Ájanas mánáidgárdi lea váldán badjelasas fuolahit buđetbelddoža mii galgá ásahuvvot áicogilvvagárdái giđa mielde. Boarrásat besset dalle fas oaidnit oahpes tiŋggaid gilvvagárddis, seammás go mánát ja boarrásat sáhttet servvoštallat.
Sámegiel joavkku beaivelatnjii leat maiddái ožžon Anne Marie Helander Johansen, ovddeš Rasmussen, sámegiel sálbma-CD:id. Eanas boarrásat dovdet su, ja Sámeradio lea ordnet dáid skearruid midjiide nuvttá. Ollu giitosat sidjiide veahki ovddas.
Jurdda lea čiŋahit beaivelanja sámi biergasiin, ja erenoamážit mearrasámi árbevirolaš atnubiergasiiguin ja čiŋaiguin. Ja dása dárbbašivččiimet veahki olbmuin. Mii dárbbašat hámpafirpmiid koarkkaiguin, hávskára, bárkofaskkona, ránuid ja káffeseahkaid jna. Vuotna ja guollebivddu leat eatnašat bargan, de jus dus ležžet dát biergasat lovttas dahje návehis, de áinnas váldit vuostá.
Buohcciidossodagas bargaba Borghild Pedersen ja Margit Pedersen sámegiel joavkkus. Jus sáhtát veahkehit min, váldde oktavuođa nuppi sudnuin, dahje prošeaktajođiheaddjiin Gro Johnseniin tlf 905 96100.
|
|
|
 |
|