Porsáŋggu gielda ođasmahttá dađistaga diehtojuohkima digitála TV-eanafierpmádaga čađaheami birra.
Lea dehálaš mearkkašit čuovvovaš dieđu: Digitála eanafierpmádat guoská dušše sidjiide geat oidnet TV:a "dábálaš" anteanna bokte.
Sidjiide geain lea parabola dahje kábelrusttet, ii váikkut digitála eanafierpmádat rievdadeapmi ja eai dárbbaš ge maidege dahkat.
Sidjiide geasa digitála eanafierpmádaga rievdadeapmi guoská, gávdno okta váldonjuolggadus: Oastte dekodára (vuostáiváldinbovssa)
Dekodára (vuostáiváldinbovssa) haga ii leat vejolaš vuostáiváldit signálaid. Gávdnojit TV:at mainna lea dekodár siste, muhto dan gal ferte gulaskuddat gávppašeaddjis.
Lea dehálaš diehtit ahte sáhtát go dál oaidnit TV2:a. Ferte leat UHF-anteanna (gohčoduvvon maid TV2-anteanna) oaidnit sáddagiid. Eatnašiin geat gehččet NRK:a lea nu gohčoduvvon VHF-anteanna, muhto dan ii sáhte gal atnit. Jus TV2 oaidná dál, de lea várra rivttes anteanna ja eanafierpmádaga olahat. NTV atná sin fierpmádaga.
Jus it oainne TV2 dál, de sáhttá liikká leat digitála eanafierpmádaga olahat. Sáhtát geahččat NTV olahankárttas lea go olahat dus.
Ruoná guovllus lea hui buorre dahje buorre olahat. Jus ránes guovllus orut, olahat várra stuorát anteanna ja anteannalasiheaddji bokte. Jus vilges guovllus orut, fertet parabola dahje kábelfierpmádaga háhkat. Vilges guovlluide gávdnojit maid muhton eará erenoamáš čovdosat .
Olahankárta NTV Geavat olahankártta panorerenfunkšuvnna gávdnat Porsáŋggu.
Dál bidjat vuos liŋkkaid digitála eanafierpmádaga guovtti deháleamos aktevrraide Riks-TV ja Norges Televisjon . Doppe gávnnat ollu dieđuid digitála eanafierpmádaga birra.
Sii geat dihtet ahte dárbbašit dekodára oastit berrejit oastit dan áiggebále. Čájehuvvo ahte áiggi ovdal go giddejit boares fierpmádaga sáhttá leat váttis fidnet doarvái dekodáriid, go ollugat eai oastte ovdal go dalle.
Porsáŋggu gielda buktá lasi dieđuid go digitála eanafierpmádaga rahpan lahkona dahje jus čájehuvvo leat dárbu diehtojuohkimii.
