Ráđđealbmá árvalusa mielde lea Porsáŋggu ovdagoddi ásahan bálkkašumi gohčoduvvon Dán jagáš Porsáŋgolaš.
Bálkkašupmi lea jurddašuvvon sidjiide geat leat dahkan juoga eareliigán Porsáŋggu ovddas, ja geat ánssášit govttolaš ávvira dan ovddas.
Ráđđealmmái čálii áššeovddidusastis ahte dákkár olbmot leat mávssolaččat báikkálaš servodahkii, ja ahte sii máŋgga láhkai márkanastet min gieldda ja daid árvvuid mainna mii háliidat stuorástallat. Evttohasválljema besset gieldda ássit ieža dahkat, ja evttohasaid sáhttá Porsáŋggu gildii sáddet birra jagi.
Ráđđealmmái čállá ahte dát bálkkašupmi ii leat kulturbálkkašumi gilvaleaddji, muhto jurddašuvvon lassin go kultrubálkkašumi eavttut máŋgga háve eai govčča buot evttohasaid.
Dán jagáš Porsáŋgolaš oažžu 10.000 kr. sturrosaš bálkkašumi ja plakeahta gieldda dovdomearkkain. Bálkkašupmi ja plakeahtta geigejuvvo gielddastivračoahkkima oktavuođas dahje nu mo gielddastivra gávdná gávnnalažžan.
Dán jagáš Porsáŋgolaš-bálkkašumi eavttut leat čuovvovaččat:
1. Porsáŋggu gieldda bálkkašupmi dán jagáš Porsáŋgolažžii galgá juhkkojuvvot juohke jagi, ja lea jurddašuvvon doarjagin ja movttidahttin eaktodáhtolaš bargui Porsáŋggus.
2. Bálkkašupmi geigejuvvo ovttaskasolbmui gullevaš Porsáŋgui.
3. Vuođđun bálkkašumi juohkimii lea dán olbmo beroštupmi, rahčamuš ja boađus mii Porsáŋggu álbmogii lea boahtán buorrin dahje muhton láhkai markanasttán dahje čalmmustahttán Porsáŋggu gieldda.
4. Bajásšaddan ja kultuvrsuorggi stivra evttoha Porsáŋggu gielddastivrii. Gielddastivra mearrida ášši.
5. Buot Porsáŋggu ássiin lea evttohanvuoigatvuohta.
Evttohasaid sáhttá birra jagi sáddet e-maila bokte dahje dán čujuhussii: Porsáŋggu gielda, ráđđeviessu, 9712 Lakselv.
