Čakčamánu 14.b. 2009 lea Stuorradigge- ja Sámediggeválga Norggas.

Jus galggat sáhtit jienastit, de fertet leat čálihuvvon jienastuslohkui, ja dás vuolábealde gávnnat dieđuid dán birra sihke Stuorradigge- ja Sámediggeválggaide.

Stuorradiggeválga jienastuslohku

Čuovvovaččain lea jienastanriekti stuorradiggeválggas:

Norgga stáhtaborgárat geat:

  • leat  deavdán 18 jagi ovdal válgajagi loahpa ja geat
  • eai leat massán jienastanrievtti Vuođđolága § 53 mielde ja geat 
  • leat, dahje oktii leamaš fievrriduvvon álbmotregistarii Norgga ássin.

Jus galggat sáhtit jienastit, de fertet leat čálihuvvon jienastuslohkui muhtun gielddas. Buot olbmot jienastusrivttiin ja geat leat registrerejuvvon Norgga ássin, fievrriduvvojit automáhtalaččat jienastuslohkui dan gildii gos ledjet registrerejuvvon ássin geassemánu 30.b. 2009. Jus oaččut válgakoartta poasttas, de leat jienastuslogus. ja das oidno makkár gielddas leat fievrriduvvon jienastuslohkui. Jus it oaččo válgakoartta ovdal borgemánu 3. beaivvi, berret váldit oktavuođa gielddain iskat leat go jienastuslogus.

Jus leat fárren eará gildii maŋŋil geassemánu 30.beaivvi, leat ain registrerejuvvon jienastuslogus ja lea jienastusriekti dan gielddas gos fárrejit eret.

Jus it leat Stuorradikki jienastuslogus, dahje oaivvildat ahte leat eará boasttuvuođat listtain, sáhtát váidit. Galgá leat čálalaš ja vuođustuvvon váidda. Váidda sáddejuvvo gieldda válgastivrii. Váidagat Porsáŋggu válgastivrii sáddejuvvojit dán čujuhussii: Porsáŋggu gielda, Válgastivra, Ráđđeviessu, 9712 Lakselv.

Jus olgorikkas ásat, muhto leat leamaš álbmotregistaris fievrriduvvon Norgga ássin daid maŋimuš 10 jagi, fievrriduvvot automáhtalaččat dan gieldda jienastuslohkui gos ledjet registrerejuvvon ássin go fárrejit Norggas eret. 

Jus it leat leamaš registrerejuvvon Norgga ássin daid maŋimuš 10 jagi, fertet ohcat du maŋimuš ássangielddas beassat čálihuvvot jienastuslohkui. Ohcan ferte leat dan gieldda válgastivrras gos don maŋimuš ledjet registrerejuvvon álbmotregistaris Norgga ássin ovdal čakčamánu 14.beaivvi tii. 21. Sáhtát váldit oktavuođa gieldda válgaovddasvástideaddjin jus veahki dárbbašat dasa.

Sámedikki jienastuslohku

Jus galggat sáhtit jienastit dán jagáš Sámediggeválggas fertet leat fievrriduvvon Sámedikki jienastuslohkui. Čáliheami áigemearri lea geassemánu 30.b. 2009.

Čálihanskovi sáhtát viežžat Sámedikki neahttasiidduin. Buohkat geat julggaštit ahte atnet iežaset sápmelažžan, ja sis juogo 

a) lea sámegiella ruovttugiellan, dahje
b) leat dahje leamaš vánhen, áhkku/áddjá dahje máttarváhnen gean ruovttugiella lea dahje lea leamaš sámegiella,
c) leat dakkár olbmo mánná, guhte lea dahje lea leamaš Sámedikki jienastuslogus

sáhttet gáibidit čálihit Sámedikki jienastuslohkui.

Njuolgaleaŋka čálihanskovvái.

Buohkat geat leat čálihuvvon dán jienastuslohkui, ožžot sierra válgakoartta sámediggeválgii poasttas. Jus it leat ožžon válgakoartta sámediggeválgii, berret váldit oktavuođa Sámedikkiin telefovnna bokte 78 47 40 00. Doppe oaččut dieđuid mii gáibiduvvo ja maid galggat bargat beassat čálihit Sámedikki jienastuslohkui.

Jus du namma ii leat Sámedikki jienastuslogus, ja leat gáibidan beassat čálihit, dahje oaivvildat ahte leat eará boasttuvuođat listtain, sáhtát váidit. Galgá leat čálalaš ja vuođustuvvon váidda. Váidaga sáddet Sámediggái dán čujuhussii Sámediggi, Ávjovárgeaidnu 50, 9730 Karasjok.
 

 

Dábálaš dieđut válgga birra gávnnat dás: www.valg.no.