Mánáidskuvllat váldet psykalaš dearvvašvuođa duođalaččat.
Issoras ja surgadis dáhpáhusat Suomas leat buktán dárbbu eanet gelbbolašvuođa psykalaš dearvvašvuođa birra Norgga skuvllaide. 11 vuođđoskuvlla Nuorta-Finnmárkkus álggahit dál eastadeaddji prográmma nuoramus oahppiide.
"Zippys skihpárat" lea eastadeaddji prográmma mii galgá vuosttaš luohkálaččaide oahpahit hálddašit juohkebeaivválaš hástalusaid buoremus láhkai. Prográmma addá mánáide reaidduid identifiseret ja hállat dovdduid birra ja suokkardit vugiid mo dovdduid gieđahallat. Gulahallanoahpaheaddji lagaš ovttasbargguin dearvvašvuođadivššáriin ja PPB:in čađahit prográmma.
Mánáidskuvlla oahpaheaddjit Porsáŋggus ovttas skuvladearvvašvuođabálvalusain ja PPB:in galget duorastaga ja bearjadaga dán vahku oahpat prográmma.
Zippys skihpárat lea oassi našunála skuvlaáŋgiruššamis "Psykalaš dearvvašvuohta skuvllas" (2004-2008) mas maiddái leat prográmmat nuoraidskuvllaide ja joatkkaoahpahussii. Buot skuvllat Finnmárkkus ožžot jagi 2009' mielde fálaldaga oahppat prográmmaid.
Mii sávvat oasseválddiide lihkku ja vuorddašat beassat juogadit máhtu ja ovttas čađahit dan maŋŋá oahpa.
