Sámi álbmotbeaivi lahkanišgoahtá, ja Porsáŋggu girjerádju álggaha ávvudeami ovddalgihtii sámegiel máinnasbottuin sámegielat mánáidgárdemánáide 3 - 5 jahkásaččaide. Heive maid mánáide geat áddejit sámegiela, muhto eai hála nu bures.

Mii lohkat jitnosit álkkes sámegiel govvagirjjiin ja háleštat sisdoalu birra. Earret lohkama, lávlut mii muhton sámegiel lávlagiid. Breva lágideami birra lea sáddejuvvon buot mánáidgárddiide Porsáŋggus.

Ođđajagimánu 31. beaivvi rájes guovvamánu 10. beaivvi rádjái čájehat mii ođđaseamus sámegiel girjjiid maid girjerádju lea oastán. Mii ávžžuhat buohkat finastit dáppe geahččamin.