Hárjehusa áigumuš lea buoridit Suodjalusa gálgga soalddátjoavkkuid hukset ja daid sirdit guhkit gaskkaid. Dasa lassin hárjehallat diehtojuohkima buoridit ossodagaid, dásiid ja suodjalansurggiid gaskkas.
Vai Suodjalus buoremus lági mielde čoavddašii bargguidis, lea dehálaš hárjehallat lunddolaš ja gáibideaddji guovlluin oktasašoperatiiva rámmas mas buot suodjalussuorggit váldet oasi. Seammás lea dehálaš ahte Suodjalus oahpásmuvvá buot guovlluiguin min guhkes riikkas gos olbmot ásset ja barget. 2013:s hárjehalaimet Hordalánddas, 2014:s Romssas, 2015:s Finnmárkkus, 2016:s Trøndelágas, ja dál máhccat Finnmárkui.
Finnmárkkus gávdnat gáibideaddji topográfiija ja dálkkádatdiliid guhkes gaskkaid lassin. Dát buktá Suodjalussii buorre liibba hárjehallat soalddátjoavkkuid doarjaga logistihka.
Lea hui dehálaš ahte Suodjalus beassá hárjehallat min lihtolaččaideametguin. Danin lea Suodjalus bovden brihttalaš ja amerihkálaš soalddátjoavkkuid váldit oasi 2017 dálvehárjehusas. Birrasii 700 soalddáha United States Marine Corps:s, United States Army:s ja brihttalaš Royal Marines váldet oasi hárjehusas. Brihttalaš ja amerihkálaš oasseváldit hárjehallet Norggas ovdal go hárjehus álgá, vai sii leat buoremus lági mielde ráhkkanan galbma dálvedálkkádagas hárjehallat. Hárjehusa olis olgoriikalaš soalddátjoavkkut ovttaiduvvet norgalaš joavkkuide.
8 000 soalddáha váldet oasi hárjehusas. Dát lohku fátmmasta buohkaid geat váldet oasi hárjehusas, maiddái sii geat váldet oasi eará guovlluin go Finnmárkkus. Ovdamearkka dihte leat koordinerenveahka Suodjalusa operatiiva váldobáikkis Budejjus ja bargit geat ráhkkanahttet girdiid mat geavahuvvojit hárjehusas, mielde dán logus.
